Համայնք

Հետաքրքիր ավանդույթներով և ծագման մասին հետաքրքիր վարկածով այս գյուղը գտնվում է բնության իդեալական միջավայրում։ Ակները գտնվում է Ալավերդի քաղաքից 10 կմ հեռավորության վրա, Դեբեդ գետի աջ ափին։ Գյուղի եզրից գեղեցիկ տեսարան է բացվում դեպի Դեբեդի կիրճը։ Գյուղի վերին հատվածից՝ անտառից, սկիզբ են առնում մի շարք բնական, զուլալ աղբյուրներ, որոնք կարևոր նշանակություն են ունեցել տեղի բնակիչների համար։

Գյուղի կենտրոնական հատվածում առկա է 19-րդ դարի առաջին կեսին կառուցված քարաշեն եկեղեցի։ Սակայն Ակների տեսարժան վայրերը դրանով չեն սահմանափակվում։ Առավել հայտնի զբոսաշրջային բնակավայրերից՝ Հաղպատ այցելելիս աջ կողմում՝ ժայռի գագաթին երևում է Կայան բերդը, որը գտնվում է Ակներ բնակավայրի հյուսիսային կողմում։ Այն եղել է իր ժամանակներում տարածաշրջանի հզորագույն ամրություններից մեկը։  Կայան բերդի հարավային հատվածում է գտնվում Դսևանքը։ Դսևանքի ջուրը անցնում է Ակներ գյուղով, ստորգետնյա քարե խողովակաշարի միջով։ 

Լոռու մարզենտրոնից՝ Վանաձորից, ընդամենը 30կմ հեռավորության վրա է գտնվում մի փոքրիկ բնակավայր՝ Ձորագետ գյուղը։ Որպես բնակավայր Ձորագետը սկսել է բնակեցվել նախորդ դարի սկզբներին երկաթուղու շինարարության ժամանակաշրջանում։ Նախկինում, բնակավայրի տարածքը եղել է Թումանյան կայարանի բազա, որի հիման վրա՝ 1924թ. –ին, ստեղծվել է գյուղը: Ձորագետը գտնվում է Վանաձոր-Ալավերդի ճանապարհի վրա, որտեղով էլ անցնում է Թբիլիսի – Գյումրի միջպետական նշանակության երկաթուղին:

Գտնվելով կիրճի ստորոտում բնակավայրը երկու կողմից շրջապատված է ժայռերով: Համայնքին առանձնահատուկ հմայք է հաղորդում այն, որ գյուղը բաղկացած է երկու բնակավայրերից՝ մեկը մյուսից 2 կմ հեռավորության վրա: Բնակավայրերից մեկով հոսում է Փամբակ գետը, իսկ մյուսով` համանուն Ձորագետ գետը, որի վրա էլ կառուցված է «Ձորագետի» ՀԷԿ-ը:

Թեև Ձորագետը բարենպաստ չէ անասնապահությամբ և գյուղատնտեսությամբ զբաղվելու համար, և այն չի կարող համարվել էկոտուրիզմի հիմնական ուղղություն, սակայն, շնորհիվ իր  աշխարհագրական դիրքի՝ առատ է տուրիստական գրավչություններով։

Լոռու մարզի զբոսաշրջային քարտեզի վրա, արդեն երկար ժամանակ իր ուրույն տեղն ունի Արդվի համայնքը։ Մարզկենտրոն Վանաձորից՝ 58 կմ, շրջկենտրոն Ալավերդիից՝ 19 կմ հեռավորության վրա գտնվող այս գյուղն ամեն տարի հազարավոր զբոսաշրջիկներ են այցելում։ 

Այստեղ այցելելով կարելի է տեսնել միանգամից մի քանի հայտնի վայրեր։ Նախ՝ այստեղ է թաղված Ամենայն հայոց կաթողիկոս, աստվածաբան, գրող Հովհան Օձնեցին, որը հանդիսացել է իր ժամանակների ամենագիտակ մարդկանցից մեկը։ 7-րդ դարից նրա գերեզմանի մոտ կառուցվել է Սուրբ Հովհաննես վանքը, որը պատմական աղբյուրներում հայտնի է նաև Սրբանես անվամբ։ Հետաքրքրական է, որ Սուրբ Հովհաննես վանքում է նկարահանվել Փարաջանովի «Նռան գույնը» ֆիլմը։ 

Արդվիում են գտնվում նաև 10-11-րդ դարերում կառուցված Կարմիր վանքը, 10-րդ դարում կառուցված Սուրբ Հարություն մատուռը և Սուրբ Կիրակի մատուռը։